BUTUAN CITY – Anaa na sa luwas nga kahimtang ang usa ka mangingisdang siyam na oras nga naglutaw-lutaw sa kadagatan sa Southern Leyte human siya nabangalan ni Mayor Val Pinat sa lungsod sa San Francisco, Surigao del Norte kagahapon sa ala-una sa hapon.
Sa eksklusibong interview sa Bombo Radyo Butuan, gi-ila ni Mayor Pinat ang biktimang si Roy Balladares, residente sa Brgy. Mabua, Surigao City.
Gibutyag sa mayor nga i-uli na unta niya ang iyang speed boat sa Cebu City dihang nalabyan pa nila ang biktima kinsa adiser pa nila nabantyan dihang mikamay na kanila rason nga ila kining gibalikan, giluwas ug gipakaon.
Migawas sa iyang pakisusi nga alas-kwatro pa lang sa kaadlawon dihang mitiklaob ang bangka sa maong mananagat human nabuslot tungod sa paghapak sa mga dagkong balud nga dala sa bagyong Ramon.
Posible matud pang mabutang sa delikado ang kinabuhi niini kung wala nila nalabyan tungod kay naluya na kini ug namuti na ang mga palad sa kamot og tiil dala sa taas-taas nga oras sa pagkahumol sa tubig.
Base matud pa sa hangyo sa biktima, ila kining gi-drop sa baybayon sa Brgy. Manglit sa lungsod sa Pintuyan, Southern Leyte sa rasong duna siya’y parinte didto.
Adiser niya gibiyaan ang biktima, nakig-alayon na siya sa kapitan sa Brgy. aron pahibal-on ang kapitan usab sa Brgy. Mabua kalabot sa nadangatan sa iyang constituent aron mapahibalo usab ang pamilya niini.
Gibinlan usab matud pa niya kini og kwarta aron duna’y iyang magamit sa iyang kinahanglanon.
