BUTUAN CITY – Nanghunaw gilayon si Nasipit, Agusan del Norte Mayor Enrico Corvera sa gipa-abot kaniyang halos usa ka dekada nang problema sa supply sa tubig sa Nasipit Water District sa iyang mga constituents.
Sa eksklusibong pakighinabi ning sibyahan, gibutyag sa mayor nga mitabang na ang local nga kagamhanan aron mabalik na sa normal ang ilang water supply.
Kamatu-uan matud pa niini ang gisudlang bulk water supply project sa maong water district nga gi-tap sa subay sa Brgy. Kinabjangan nga maoy ilang i-filter og ipa-ilalom sa treatment aron maoy ma-supply ngadto sa mga concessionaires.
Padayon matud pa kining gitrabaho rason nga base sa pagpahibalo kanila sa manager sa maong water district, posibleng mubalik ra sa normal ang supply sa tubig sa buwan sa Septembre.
Nakurat na lang ang imbestigador ning sibyahan kalabot sa maong isyu dihang kalit nga misinghag si Mayor Corvera human siya gipangayuan og ideya kalabot sa kabalaka sa mga residente sa Brgy. Kinabjangan nga ma-privatize ang maong proyekto og dili na unya sila makalaba o kaha makaligo pa sa maong suba.
Wala na kini mikuha pa og dugang impormasyon hinuon gipasanginlan pa niini ang Bombo Radyo nga maoy nagpatuo sa mga tawong i-privatize ang nasangpit nga proyektong gisudlan karon sa water district.
Ang kasuko sa mayor iyang gipasibaw taliwa nga wala pa gani mapa-abot kaniya ang nakuhang A-1 information ning sibyahan nga duna’y opisyal sa maong munisipyo nga matud pa nangayo og bahin gikan sa matag-metriko kubikong ma-supply ngadto sa mga concessionaires.
