BUTUAN CITY – Balhog na sa karsel ang duha ka aktibong traffic enforcers ning siyudad ug usa ka sibilyan human nakuhaan og suspected shabu sa sunod-sunod nga gipahigayong drug buy bust operation kagabii sa managlahing dapit.
Unang nasikop sa operasyon pasado alas-6:30 kagabii sa ginsakpan sa Philippine Drug Enforcement Agency kon PDEA-Caraga ang traffic enforcer nga si Rey Misanes, residente sa Arujville Subdivision sa Barangay Libertad kinsa kanhi nang drug surenderee.
Nakuha sa posisyon sa suspek ang 2 ka sachets nga dunay sulod sa gitu-uhang shabu lakip na usab ang buybust money nga 500 pesos ingon man usa ka cell phone.
Gisundan kini sa follow-up operation paglabay sa usa ka oras human nabasa gikan sa iyang cell phone ang text sa ka-ubanang si John Alvin Suronda, 26-anyos nga magpadala kaniya og foil kinsa nakuhaan usab og usa ka sachet sa susamang epektos.
Paglabay sa tunga sa oras, sunod nga gisikop sa may Guingona Park ang ilang higalang si Paul Peter Torayno, 26-anyos, lumad nga taga-Cagayan de Oro City apan dinhi na sa Butuan nagpuyo og nagtrabaho kinsa nakuhaan usab og usa ka sachet sa gidudahang shabu.
