BUTUAN CITY – Tungod sa wala matud pa madawat nga election money gikan sa ilang gisuportahang kandidato dinhi sa dakbayan sa Butuan nga hatud sa ‘Vote Now, Pay Later’ scheme, midangop ning sa Bombo Radyo Butuan ang duha ka mga botante sa usa ka barangay.
Kini aron ireklamo ang matud pa, pag-imoy sa ilang barangay kapitan sa ilang usa ka libo ka pesos nga gahin alang unta kanila.
Sigon sa usa sa mga reklamanteng gitago lang sa pangalang Inday, nagbalik-balik na lang sila og adto sa balay sa ilang barangay kapitan sukad pa ning mi-aging gabii aron kuhaon ang ilang gahin.
Dihang wala gihapon kini gihatag kanila pagka-buntag, nagdesisyon na silang ireklamo kini dinhi sa sibyahan sa pagtuong matabangan nga mahatag kini kanila ilabina nga duna pa’y ilang pipila ka mga ka-ubanan nga wala pa usab makadawat niini og gisultihan na lang siya nga wala na matud pa’y kwarta.
Samtang gihingusgan usab sa iyang ka-ubang gitago lang sa pangalang Neneng nga pursigido silang kuhaon kini sa rasong apil matud pa sila sa listahan sa mga angayang hatagan.
Gani, milinya pa siya nga sama sa ilang gihimo atol sa pagbotar kondiin ang matawag matud pang pangalan, duna’y pirmahan og adiser pa itunol ang kwarta apan migabii na lang, wala gihapon tawaga ang iyang pangalan rason sa iya usab nga pagdangop ning sibyahan.
