BUTUAN CITY – Mi-ani karon og managlahing reaksyon sa mga Butuanons ang subling pagbutho sa expose kaniadto ni kanhi Konsehal Sammy Amante kalabot sa gika-ingong ang kampo nila kanhi Mayor Ferdinand ‘Jun’Amante ang midaog sa 2016 elections og dili ang sa kasamtangang administrasyon.
Sa eksklusibong pakighinabi ning sibyahan, gibutyag ni Amante nga kaniadto pa human sa eleksyon niya gi-expose nga dili tinuod nga midaog sa eleksyon ang kasamtangang nagkupot sa renda sa lokal nga kagamhanan ning siyudad.
Ang mga tawo matud pa nga nagbaligya sa mga PCOS machines sa Smartmatic ang nag-initiate sa seguradong kada-ugan sa eleksyon bugti sa dakong kantidad sa kwartang ilang pangayuon.
Gani, siya matud pa ang unang giduol sa usa ka Evelyn aron kini ang gamiton nga maoy mugarantiya sa ilang sure win nga dihang iyang gikunsulta sa mga ka-ubanan nila sa ilang bando, wala nila gamita sa rasong limbong matud pa kini.
Dihang wala sila misanong sa tagal nga gihatag kanila, gi-istorya na usab matud pa sa grupo ang bando nila kaniadto opposition candidate og karon Mayor Ronnievic Lagnada sa buwan pa lang sa Pebrero 2016 og pagka-Abril na, nakadungog na sila og istoryang luto na matud pa ang resulta nga 13-0 tungod kay nakabayad na ang TCL team.
