BUTUAN CITY – Nag-ong-ong na ang 90 ka adlaw nga preventive suspension batuk kang Deputy Speaker Prospero Pichay Jr.
Sa resolusyon nga gipagawas sa Sandiganbayan nga pirmado ni Associate Justice Reynaldo Cruz, gimandu na sa Fourth Division ang ‘cease and desist’ kang Pichay gikan sa paghawid niini sa iyang katungdanan isip magbabalaod ug 1st District sa Surigao del Sur Representative kondiin sulod sa nasangpit nga mga adlaw, dili usab makadawat si Pichay og suweldo ug benepisyo.
Tumong sa kamanduan sa Sandiganbayan nga pug-ngan si Pichay nga makaapekto sa pagkuha og mga dokumento ug testigo sa kasong graft batuk kaniya mahitungod sa matud pa anomalusong banking deal niini niadtong 2009.
Gipamugos usab ni Pichay sa Sandiganbayan nga irekonsidera ang suspensiyon batuk kanya ug gitin-aw nga wala na siya’y koneksiyon sa Local Water Utilities Administration kon LWUA rasong dili na kini maka-impluwensiya sa testigo o makahawid sa mga dokumentong importante sa iyang kaso.
Dugang pa ni Pichay, ang tanang mga kinahanglang dokumento sa kaso iya na usab nga nasubmite ngadto sa Office of the Ombudsman.
Apan sumala sa Sandiganbayan, alayon sa Section 13 sa Anti-Graft and Corrupt Practices Act, ang bisan kinsang opisyal nga nag-atubang sa kasong kriminal ang kinahanglang masuspinde sa opisina.
Gihatagan usab og lima ka adlaw ang House of Representatives sugod sa pagdawat niini og resolusyon gikan sa Sandiganbayan para kini aksyunan.
