BUTUAN CITY – Dili mu-ubos sa walo ka mga tawo ang patay sa gihimong police raid sa sentrong bahin sa Rio de Janeiro, subay sa nagpadayon nilang duguong mga operasyon sa kabus nga favela communities.
Sigon sa Brazilian police, ang maong raid mikalas kang Claudio Augusto dos Santos, ang kumander sa gamhanang criminal group nga Comando Vermelho kon Red Command.
Sigon ni military police chief Marcelo Menezes Nogueira, ang maong raid miresulta sa lapad nga armadong komprontasyon nga miresulta sa pagkamatay ni Dos Santos ug laing unom ka gidudahang mga kriminal samtang usa usa ka residente ang na-igo sa saag nga bala. Sigon sa mga residente, nanimalos ang mga sakop sa Red Command pinaagi sa pagbabag sa kadalanan dayong sunog sa usa ka bus.
Sigon sa mga pulis, lima ka mga tawo ang ilang naaresto tungod sa gika-ingong acts of vandalism.
Nasayrang mi-abot sa 150 ka mga military police officers ang milambigit sa raid sa Prazeres, Fallet, Fogueteiro, Coroa, Escondidinho ug sa Paula Ramos.
Si Dos Santos gikutay ngadto sa drug trafficking sa Prazeres favela, kinsa duna’y napulo ka mga warrants alang sa pag-aresto kaniya.
Gilambigit usab si Dos Santos sa pagpatay sa Italian tourist nga si Roberto Bardella.
