BUTUAN CITY – Upat ka oras nga gibaktas sa 73-anyos nga lolong si Jose Babor gikan sa ilang barangay sa Los Angeles ning siyudad padulong dinhi sa sibyahan sa Bombo Radyo Butuan aron lang ireklamo ang matud pa, dili patas nga pagpang-apod apod sa relief goods gikan sa city government.
Sa asuy ni Babor, wala siya makadawat sa una ug ikaduhang hugna sa mga relief goods nga gipang-apod apod sa city government ilabina ang tag-25-kilong bugas uban sa mga grocery items.
Ang iyang gikadismaya tungod kay ang iyang silingan nga duna’y saktong panginabuhian ug kadtong mga duna’y tindahan, mas nahatagan na hinuon kaysa kaniya.
Migikan siya og alas-singko kaganinang sayo sa buntag ug naka-abot ning sibyahan pasado alas-nueve na sa buntag aron lang personal nga mapasibaw ang iyang yangungo.
Tumang pasalamat ang iyang gibati dihang natunulan kini og 5-kilong bugas dinhi sa sibyahan ug nakadawat pa siya og libreng reading eye glasses nga dakong tabang sa hanap na usab niyang panan-aw ilabina kung magbasa.
