BUTUAN CITY- Patay ang labing menos 79 ka mga tawo ug kapin sa 100 ang naluwas human nalunod ang barkong dunay sakay nga mga migrante sa kadagatan sa Greece.
Sigon sa report nga nagdumili matud pa sa tabang sa coastguard ang mga sakay sa maong barko nga nalunod sa 80 kilometros habagatan-kasadpan sa Pylos sa nahisgutang nasdod.
Ningawas usab sa inisyal nga imbistigasyon nga walay mga pasahero nga nagsul-ob og life jacket sa maong barko, ug nahitabo matud pa ang maong insidente wala madugay human nga nakontak sa coastguard ang usa sa mga pasahero niini pinaagi sa satellite phone, uban sa lain pang mga sakay sa barko, apan gi klaro matud pa sa mga niini nga wala na sila nagkinahanglan ug tabang ug gusto lang nila nga maka abot sa Italy.
Kahibaloan nga gikan pa sa Libya ang maong mga migrante kansa nangindahay lamang nga maka abot sa Italy aron sugdan ang laing palid sa ilang kinabuhi. sumala pa sa mga naluwas nga wala na matud pa sila nidawat sa tabang sa mga coastguard tungod kay nasayod matud pa sila kung unsa ka istrikto ang Greece, diin sigurdo ang mga niini nga papaulion lamang sila sa ilang nasod nga gigikanan.
Sa kasamtangan, nagdeklara na ug tulo ka adlaw nga pagbangutan ang nasod sa Greece tungod sa maong panghitabo.
