BUTUAN CITY – Magtakda pa og laing public consultation ang komitiba ni Butuan City Councilor Vincent Rizal Rosario, chairman sa committee on transportation sa Sangguniang Panlungsod aron dunggon pa ang petisyon sa sektor sa transportasyon nga himuon nang 12-pesos ang minimum nga plitihan sa traysikol.
Sigon sa konsehal, wala maresolba sa consultative meeting kagahapon ang nag-unang isyu sa maong petisyon ilabina ang pagpresentar sa formula kung nganong mi-abot sila sa punto nga 12 pesos ang minimum nga plitihan sa traysikol ug dugangan og 2-pesos sa musunod nga kilometro.
Una nang gimanduan ni konsehal Rosario nga transport sector nga ipakita ang detalyadong pagpasabot sa kantidad nga gusto nilang ipatuman niadtong unang pagdungog sa petisyon apan tungod sa kapakyas sa ilang presentasyon, nagmugna na lang ang komitiba og technical working group nga maoy mag-formulate ug magtuon sa nasangpit nga petisyon.
Gipadali ni Konsehal Rosario ang transport sector sa pagsubmite sa iyang gipangayong formula nga gustong mapasa sunod semana.
Sa kabahinan usab ni Wilfedo Jun Ybañez Jr, chairman sa Butuan Transport Federation, gikonsidera niining malampuson ang ikaduhang consultative meeting nga nagsilbing katin-awan sa nagkada-iyang sektor.
Sumala pa niini, ubay-ubay ang nakasabot samtang duna gihapoy kinahanglan pa og dugang katin-awan.
Pagbutyag pa ni Ybañez, natubag na nila ang mga pangutana atol sa maong pagdungog tungod kay duna man usab sila’y gihimong lawom nga pagtuon sa ilang petisyon.
Tinguha lang matud pa sa maong meeting ang detalyadong presentasyon sa ilang petisyon.
