BUTUAN CITY- Nagpagawas og mga tips ang World Health Organization kon WHO Philippines kung unsaon pagkontra sa kainit sa panahon, ilabi na sa Pilipinas diin naka sinati ang ubanng mga dakbayan niini og danger kon delikado nga temperatura ning naka labay nga semana agi sa nasinatiang El Niño.
Sumala sa post sa maong ahensya sa social media account niini kagahapong adlawa, Abril 10, giabisohan ang mga Pilipino nga kinahanglang magpabiling Hydrated pinaagi sa pag inom kanunay og tubig, pag likay sa mga alcoholic nga ilimnon, ingon man sa mga caffeinated og mga tam-is nga mga mainum sama sa kape.
Dugang niini nga kinahanglang magsuot og “light-colored” nga mga sinina, ingon man mga luag og komportable lamang nga mga sapot ang suoton, sa ingon nga malikayan ang tumang kaigang.
Alayon niini, giabisuhan usab sa nasangpit nga ahensya ang publiko nga kinahanglang dunay pahulay ang mga bata ugaling mag duwa-duwa kini sa gawas nga bahin sa panimalay. Dugang pa, kinahanglan usab nga likayan, ilabi na sa mga hamtung, ang hagu nga mga trabaho.
Ika-lima mao ang paglikay sa pagawas sa balay ilabi na kung naglagiting ang kainit, ug ang ika unom mao nga kung mahimo, kinahanglan nga mopasilong sa mga landong kung dili man galing malikayan nga mogawas sa balay.
Kahibaloang gipagawas na usab sa Philippine Atmospheric, Geophysical, and Astronomical Services Administration (PAGASA) ang Heat Index forecast niini taman sa Abril 12, diin pinaka taas nga masinatiang Heat Index ang 42°C ngadto sa 44°C nga temperatura sa mga lugar sa Dagupan City, Pangasinan; Bacnotan, La Union; Puerto Princesa City, Palawan; Aborlan, Palawan; Laoag City, Ilocos Norte; Masbate City, Masbate; Roxas City, Capiz; Dumangas, Iloilo; Catarman, Northern Samar; Zamboanga City, Zamboanga del Sur; ingon man sa Cotabato City, Maguindanao.
Sumala sa PAGASA nga ang maong temperatura, anaa na sa danger level, kon delikado na alang sa mga lumpluypo sa maong lugar og kinahanglan nga sundon na ang mga nahisgutang tips.
