BUTUAN CITY – Giklaro ni Department of National Defense o DND Secretary Gilberto “Gibo” Teodoro Jr. ang importansya sa pagtahod sa internasyonal nga mga balaod ug pagpalig-on sa kooperasyon sa seguridad atol sa 13th ASEAN Defence Ministers’ Meeting-Plus o ADMM-Plus nga gipahigayon sa Lapu-Lapu City, Cebu niadtong Oktubre 29, 2026.
Sa iyang pakigpulong atubangan sa mga representante gikan sa ASEAN ug sa mga dialogue partners niini, gipadayag sa kalihim ang tulo ka nag-unang prayoridad aron mapalambo ang kalinaw, kalig-on ug seguridad sa rehiyon sa Indo-Pacific.
Lakip niini ang hugot nga pagtuman sa United Nations Charter ug sa 1982 United Nations Convention on the Law of the Sea o UNCLOS, pagpalig-on sa kooperasyon sa maritime security, ug pagpanalipod sa mga migrant worker ug seafarer taliwala sa nagkadaiyang krisis sa kalibotan.
Gigamit usab sa kalihim ang maong higayon aron awhagon ang panaghiusa sa mga nasud sa pagsiguro sa food security ug energy security batok sa mga hulga ug hagit sa global supply chain.
Gidugang pa ni Teodoro ang mahinungdanong papel sa internasyonal nga komunidad sa pagpanalipod sa kaayohan sa mga Overseas Filipino Workers o OFWs ug mga marinero nga dako og kontribusyon sa ekonomiya sa kalibotan, ilabina panahon sa mga armadong panagbangi ug mga emerhensya sa nagkadaiyang nasud.
Gipahigayon ang maong tigom sa Cebu isip kabahin sa padayon nga pag-host sa Pilipinas sa sunod-sunod nga taas nga lebel nga mga panaghisgot sa ASEAN karong tuiga.
Nahimong venue ang maong probinsya sa panagtigom sa mga defense minister ug mga lider sa seguridad gikan sa napulo ka nasud sa rehiyon ug sa ilang mga nag-unang dialogue partners sama sa United States, China ug Japan.
Tumong sa maong mga tigom nga palig-onon ang diplomasya ug hisgotan ang mga nag-unang isyung geopolitikal sama sa seguridad sa West Philippine Sea ug pagmintinar sa kalinaw sa tibuok rehiyon sa Indo-Pacific.
