BUTUAN CITY – Posible pang marekober ang mga bukog sa nga nawala nga mga sabungero, ugaling tinuod man gani nga gitambog ang ilang mga lawas sa Taal Lake sigon sa Department of Science and Technology (DOST).
Una nang giangkon sa whistleblower sa maong kaso nga si Julie “Dondon” Patidongan nga gilubong sumala pa sa lawom nga bahin sa lawa sa Talisay, Batangas ang lawas sa mga nawala nga sabungeros.
Sumala ni DOST Secretary Renato Solidum, dali ra matunaw o ma-decompose ang unod sa lawas sa usa ka tawo, apan ang mga bukog posibleng mapreserbar, depende sa kalalom sa tubig ug kalidad sa oxygen nga anaa sa palibot.
Giklaro sa mga otoridad nga nangayo na sila og tabang sa Japan aron magamit ang ilang high-tech nga kagamitan sa pagpangita.
Sa baylo nga magpadala og divers, girekomenda ni Solidum nga gamitan nalang og underwater camera, tungod dili luwas ang pagsalom o paglangoy sa lawom nga bahin sa maong lawa.
