BUTUAN CITY – Mopailalom sa nagkadaiyang assessment og documentation ang 5 ka kanhe miyembro sa rebelding New People’s Army kon NPA human misurender sa kasundaluhan kagahapon, Enero 7, 2025.
Kini aron ma-enroll ang mga niini sa Enhanced Comprehensive Local Integration Program kon E-Clip sa gobyerno og makadawat sa nagkadaiyang klase sa assistance, aron matabangang makasukod sa ilang bag-ong kinabuhi.
Nasayrang bolutaryong misurender ngadto sa 26th Infantry Battalion, Philippine Army, ang 5 ka miyembro sa New People’s Army nga gilangkuban sa upat ka regular member gikan sa Headquarters Loader, Sub-Regional Committee 2 og usa ka regular member gikan Headquarters NEO parehong sakop sa North Central Mindanao Regional Committee (NCMRC).
Lakip sa gisurender sa mga niini ang 4 ka high-powered firearms nga gilangkuban sa usa ka AK47 rifle; usa ka Carbine 5.56mm M653 Rifle; duha ka Garand rifles, og usa ka Carbine nga dunay mga buhing bala samtang dunay usa ka low-powered firearm.
Sa nahimong pamahayag sa usa sa mga misurender nga si Alyas Jaya, gibutyag niining naningkamot siyang makasurender tungod sa grabe kalisud sa maong kalihukan diin nahadlok sila alang sa ilang kinabuhi tungod sa kakusog sa opensiba sa kasundaluhan.
Sumala pa niini, wala siya makasinati og kahayahay sa onse ka tuig niya sa kalihukan diin pulos lang kamingaw og kalooy ang iyang gibati sa gibiyaan niyang mga anak.
Sa karun, gusto na niyag malinawon nga kinabuhi kauban ang pamilya samtang gi-awhag ang mga kaubanan nga mosurender na usab.
