BUTUAN CITY – Upat ka mga minero ang patay, usa ang naluwas samtang laing tulo ang missing human ang natigayong landslide sa dapit nga ilang giminahan sa Mt. Manhupaw sakop sa Brgy. Poblacion 2 lungsod sa Santiago nga boundary na sa lungsod sa Jabonga, parehong sakop sa lalawigan sa Agusan del Norte.
Gi-ila ni P/Insp. Ronilo Dormetorio ang mga biktimang sila Ramil Ilagan, Cosiano Ilagan, Rene Ilagan og Rex Pinig samtang ang naluwas mao si Allan Daging, parehong residente sa maong lungsod.
Samtang ang mga missing nga subject na sa search and rescue operation nailang sila Tata Salahay, Diay Matanog, og usa ka alyas Ganggang.
Sigon ni Insp. Dormetorio, misaka sa maong bukid ang mga biktima alang sa ilang small scale mining operation dihang na-abtan sa pila ka adlaw nga pagbundak sa kusog nga ulan nga hatud sa bagyong Amang.
Base sa ilang pakisusi kang Jasmin Ilagan – asawa sa namatay’ng si Ramil, pasado matud pa sa alas-nueve ning mi-aging gabii dihang midahili ang parte sa bukid nga ilang gitrabahuan.
Dugang ni Insp. Dormetorio, ginaog na ang patay’ng lawas sa mga biktima og tungod sa sobra kalayo sa maong lugar nga mu-abot sa 27 kilometros gikan sa sentrong bahin sa maong lungsod, gila-umang karong gabii pa kini maka-abot. (Beth Ruiz)
