BUTUAN CITY – Mi-abot sa 314 ka mga pamilya gikan sa lima ka mga barangay ning siyudad ang nahatagan na og food packs ug hot meals sa City Social Welfare and Development kon CSWD-Butuan human nanghikling kagahapong adlawa dihang mitaas ang water level sa Agusan River tungod sa padayong pag-ulan.
Sigon ni Michiko de Jesus, tigpamaba sa Butuan City government, ang maong ihap nanghikling sa Agusan National High School kondiin taga-brgy. Golden Ribbon ang nag-ukupa, karaang barangay hall sa Baobaon, San Vicente Elementary School, covered court sa Brgy. Baan River Side ug sa Mandamo Elementary School.
Wala matud pa’y angayang kabalak-an sa supply sa food packs tungod kay duna na’y gigahin ang CSWD-Butuan nga mulungtad hangtud sa duha ka semana. Gipadayag niining sa ilang pinaka-ulahing monitoring, wala na’y mga bakwit sa Mandamo Elementary School human nga milurang na ang tubig-baha kaganinang sayo sa buntag.
Subay niini, nanghinaut si de Jesus nga padayon pa ang pag-ubos sa water level sa Agusan River aron makabalik na sa ilang tagsa-tagsa ka pinuy-anan ang mga namakwit.
