BUTUAN CITY – Miabot na sa 30 ka indibidwal ang patay sa mitiklaob nga bangka human gihapak sa kusog nga hangin ug balud sa Barangay Kalinawan, Binangonan, Rizal kagahapon sa ala-una sa hapon.
Nagtinabangay ang mga residente ug Philippine Coast Guard kon PCG alang sa search and rescue operation aron mahaw-as ang mga pasahero sa tubig nga kadaghanan wala nay kinabuhi.
Nasayran nga pauli na sa Talim Island ang mga pasahero sakay sa MBCA Princess Aya dihang gisugat sa kusog nga hangin ug balod rason sa pagtakilid ug hingpit nga pagtiklaob niini.
Tungod niini, natabunan ang mga sakay nga pasahero rasong wala na makahaw-as pa sa tubig ug hingpit nang nalumos.
Sumala sa kumpirmasyon sa PCG, anaa sa 70 ka pasahero ang sakay sa bangka ug gikumpirma pa nila ang kinatibuk-ang detalye sa panghitabo samtang nagpadayon ang ilang search and rescue operation.
