BUTUAN CITY – Gipawala’y sala ni Judge Marigel Dagani-Hugo, presiding judge sa Regional Trial Court, Branch 3 nga nakabase sa Brgy. Libertad ning siyudad sa Butuan, ang kasong libel nga gipasaka ni Butuan City Mayor Ronnievic Lagnada batuk sa mga tigbalita nga sila Salvador ‘Bads’ Cupin sa lokal nga mantalaang Mindanao Centro Daily uban sa reporter nga si Mark David Bequilla og laing duha nila ka mga ka-ubanan nga sila Mary Ann Ranido og Joseph Sy.
Gipasaka ang maong kaso sa mayor ning siyudad, tungod matud pa sa ilang panagkunsabo aron dauton ang iyang reputasyon sa ingon kalagutan og biay-biayon matud pa siya sa publiko apil na ang iyang gipanag-iyahang Equi-Parco Construction Company kon EPCC.
Kini subay sa gipublisar matud pa diha sa Mindanao Centro Daily niadtong Nobyembre 8, 2013 nila nga publikasyon sa artikulong ‘Ang Hayan Padulngan sa BCWD’ nga duna matud pa’y sulod nga makadaut nga mga gipamulong. Kini subay na sa problema sa water supply ning siyudad nga gidumala ni Engr. Anselmo Sang Tian sa Butuan City Water District og gisugyot nga solusyunan ni Mayor Lagnada pinaagi sa sudlan nilang kontrata.
Napakyas matud pa ang panig sa prosekusyon pag-overcome sa paghatag sa ebidensya human nga wala makapresentar sa gikinahanglang gidaghanon sa mga ebidensya taliwa nga ang depensa wala magpresenta og ebidensya sa korte.
Nasuta pa sa korte nga wala’y intensyon ang komentaryo sa kolum ni Joseph Sy nga dauton si Lagnada otungod kay gihimo kini sa ngalan sa kamatu-uran aron masayod ang katawhan kalabot sa saktong proseso og mga procedures sa sudlang kalabutan sa ingon malikayan ang pagduha-duha.
Niini nga kaso, mireklamo ang mga tawo kalabot sa transparensiya sa kasabutan. Sa onse ka palid nga desisyong gipirmahan ni Judge Hugo, gibutyag niining dili guilty beyond reasonable doubt ang mga akusadong sila Salvador Cupin, Mary Ann Ranido og Joseph Sy rason nga gibasura ang ang maong kaso. (Beth Ruiz)
