BUTUAN CITY – Hingpit nang gikansela sa Department of Education kon DepEd-Caraga ang 2020 Caraga Region Athletic Association Meet – Island Games sa Siargao Island kansa sugdan karong Marso 13 – adlaw’ng Biernes.
Kini isip pagsunod sa DepEd Memorandum No. 32-2020 human gipatuman sa Inter-Agency Task Force for Emerging Infectious Diseases ang Code Red sub-level 1 alert tungod sa padayong pagsaka sa mga kaso sa Covid-19.
Sa eksklusibong pakighinabi sa Bombo Radyo Butuan, gibutyag ni Bernard Abellana – regional sports coordinator sa DepEd-Caraga nga human nagdesisyon ang ilang sentrong buhatan nga kanselahon ang tanang mga national ug regional activities, mi-apela kang Education Secretary Leonor Briones si Caraga Regional Director Francis Cesar Bringas nga ipadayon ang Island Games sa Siargao apan gibasura kini sa kalihim.
Nasayran nga sa tanang mga kalihukang gihan-ay sa maong ahensya, bugtong wala gikansela mao ang 2020 National Festival of Talents sa Ilagan, Isabela ug National Schools Press Conference nga gipahigayon sa Tuguegarao City.
Tungod niini, wala’y laing mahimo ang ilang ahensya kondili ang pagsunod na lamang sa kamanduan aron malikayan ang pagkaylap pa sa maong sakit ilabina nga wala pa’y kasiguruhan kung kanus-a matapos ang krisis.
Kini bisan pa man nga sa dose ka delegasyon, napulo na ang nakaba-abot sa maong isla kagahapong adlawa.
Wala pa’y klaro kung kanus-a himuon ang maong kalihukan tungod kay mag-agad lang kini sa mamahimo unyang dagan sa Covid-19 sa nasud.
