BUTUAN CITY – Malampusong nabungkag sa ginsakpan sa Philippine Drug Enforcement Agency kon PDEA-Caraga uban ang mga pulis nga sakop sa Butuan City Police Station 4, ang usa ka drug den sa gilusad nga buy-bust operation sa kapulisan ning nakalabay’ng gabii sa may Purok 3, Brgy. Bobon ning siyudad sa Butuan nga miresulta usab sa pagkasikop sa upat ka mga drug personalities.
Naila ang mga nadakpan nga sila Rizaldo Alvero, ang nagmintina sa drug den, Renil Torrlaba, Zaldy Curilan ug Ramil Balani kinsa nangakuhaan og siyam ka sachet sa 12.24-gramos nga gibug-aton sa gidudahang shabu nga nagkantidad og 83-mil, 299-pisos.
Sa eksklusibong pakighinabi sa Bombo Radyo Butuan, gibutyag ni PDEA-Caraga spokesperson Dindo Abellanosa nga sa gipahigayong drug test, nagpositibo sila Renil Torralba ug Ramil Balani.
Dugang ni Abellanosa, bisan og nagnegatibo sa drug test ang laing duha nga sila Alvero ug Curilan, mag-atubang gihapon sila og kasong pagbisita sa drug den.
Kini bisan pa man og gipadayag sa duha nga naka-agi lang sila sa maong lugar dungan sa pagklaro sa opisyal nga makita sa body camera nga diha sila mismo samtang naglatay ang laing duha nga nagpositibo.
