BUTUAN CITY – Gihulat pa karun ang pag-claim sa mga kabanay sa patay’ng lawas sa duha ka rebeldeng New People’s Army kon NPA nga nakalas human ang engkuwentro kagahapon sa alas 5:00 sa buntag sa may Km. 4, Purok 4, Brgy. Oro, Esperanza, Agusan del Sur.
Giila ni Capt. Al Anthony Pueblas, CMO Officer sa 402nd Brigade Philippine Army ang mga namatay nga sila Juan Precioso alyas Max, 59-anyos ug Dondon Montilla, 23-anyos.
Saysay pa ni Capt. Pueblas nga nakadawat sila ug taho nga dunay nasigpatang mga armadong lalaki sa maong dapit hinungdang gelayon naglusad ug security patrol ang 23rd Infantry Battalion, Philippine Army.
Human sa 5 minutos nga engkuwentro batuk sa mga miyembro sa Guerilla Front Committe 88 sa NPA, narekober nila ang maong mga patay’ng lawas kauban na ang 9mm ug .45 nga kalibre nga pistola uban sa mga buhing bala.
Samtang sa nahitaboan sa engkuwentro, daghang mga mantsa sa dugo ang nakita nga posibling duna pay mga samdan sa panig sa walhong grupo ug swerte usab nga walay natalang na-igo sa han-ay sa kasundaluhan.
Nasuta usab nga naghimu ug pulong-pulong ang nasangpit nga mga rebelde sa maong dapit.
