BUTUAN CITY – Padayon pa ang imbestigasyon sa kapulisan mahitungod sa pagkasunog-patay sa duha ka bata ning nakalabay’ng alas 11:30 sa udto sa Sitio Da-o, Purok 2 Brgy, Camayahan ning sakbayan sa Butuan.
Sa eksklusibong pakighinabi ning sibyahan kang Pastor Janito Pacudan, silingan sa managsuong biktima, nagdula matud pa og lighter sila Gabriel Tante, 4-anyos ug Janjan Tante. 2-anyos nga ilang gidagkot sa banig hinungdan sa pagkasunog sa ilang panimalay.
Dihang iya matud pa kining gidala sa balay tambalanan, naka-istorya pa kaniya ang maguwang ug gisaysay pa niini ang maong panghitabo.
Sigon ni Pacudan, posibleng wala na makaya sa mga bata ang na-angkong mga paso sa lawas hinungdan sa ilang kamatayon.
Nasayran nga niadtong higayuna, ang magsuon lang ang nabilin sa ilang panimalay tungod kay ang amahan nagsag-ob og tubig samtang ang inahan nilugsong ning siyudad aron mupalit ug gamit sa balay hinungdan nga walay nakasagda sa mga biktima nga nagdula sa nakaplagan nilang lighter.
Kasamtangang gihaya ang patay’ng lawas sa mga biktima sa Pentecostal Church sa nansagpit nga lugar. (Melody Valledor)
