BUTUAN CITY – Gi-anunsyo sa Department of Trade and Industry (DTI) nga posibleng mosaka ang presyo sa pipila ka mga baligya human sa Abril 16, human sa temporaryong price freeze agreement tali sa manufacturers ug retailers.
Sumala ni Trade Secretary Cristina Roque, walay pagtaas sa presyo sa basic necessities ug prime commodities hangtod Abril 16, apan gilauman nga mahimong mosunod ang price adjustments sa pipila ka produkto human niini.
Gisiguro sa DTI nga kapin sa 200 ka basic goods—lakip na ang de-lata, gatas, kape, sabon, ug bottled water—magpabiling stable ang presyo sulod sa maong panahon, samtang nagpadayon ang monitoring ug senimana nga pulong uban sa mga manufacturers.
Samtang, gibutyag sa Department of Agriculture nga nagpabiling stable ang supply sa pagkaon sa nasod bisan pa sa global uncertainty ug tensyon sa Middle East, bisan pa man nga ginabantayan ang posibleng epekto niini sa presyo sa lana ug fertilizers.
Nagpasidaan usab ang DTI batok sa hoarding ug profiteering, ug gipasiugda nga istriktong ipatuman ang Price Act batok sa mga molapas niini.
