BUTUAN CITY – Nakahiagum og injuries sa kalawasan ang duha ka mga madre human usab nadisgrasya ang gisakyan niining sakyanan pasado kagabii. Nahitabo ang aksidente sa P-1A, Brgy. De Oro, Butuan City pasado alas 6:15 ang takna.
Naila ang mga madre nga sila Felicidad Solaturio , 72-anyos, og Anecita A. Oser, 71-anyos parehong residente sa Sacred Heart of Jesus Convent sa Brgy. Diego Silang, Butuan City.
Sa nakuhang impormasyon gikan sa kapulisan, sakay ang mga biktima sa puti nga Toyota Hi-Ace van nga tangag sa plate number ABC 4832 samtang gimanehuan ni Sister Solaturio.
Samtang gisubay niini ang national highway sa wala madeterminang kakusgon sa dagan, nawad-an ang drayber og control sa manubela rasong mibabag ang sakyanan dayung hulog sa drainage canal.
Ang mga mirespondeng OPCEN personnel na ang midala sa mga biktima ngadto sa Butuan Medical Center alang sa medikal nga atensiyon.
