BUTUAN CITY – Gipasalig sa lokal nga panggamhanan sa Manila nga andam kini sa pag-apod-apod og mga tambal batok sa mga sakit nga makuha sa pagbaha tungod sa padayong pag-ulan.
Sigon ni Manila Mayor Francisco “Isko” Moreno Domagoso, nag-andam na ang siyudad og hangtod 165,000 ka kapsula sa tambal batok sa leptospirosis, nga anaa sa mga health centers sa nagkalain-laing distrito sa Manila alang sa mga nanginahanglan.
Sigon sa mayor, nakakat-on sila gikan sa mga kasinatian kaniadto, busa mas gipakusgan nila karon ang pag-andam og tambal isip dugang proteksyon, ilabina alang sa mga muhumol sa baha.
Gidayeg usab ni Moreno ang regular nga de-clogging o pagpanglimpyo sa mga kanal, pagkolekta sa basura ug paspas nga pagtubag sa mga pahikling nga iyang gituohang nakatabang sa pagpakunhod sa epekto sa pila ka adlaw nga halos walay hunong nga pag-ulan tungod sa habagat.
