BUTUAN CITY – Malampusong nabalhin sa Philippine Coast Guard (PCG) ang kapin sa 160 ka pasahero kagahapong adlawa, Domingo, Abril 5, human masangad ang usa ka pampasaherong barko sa mabaw nga katubigan duol sa Lubang, Occidental Mindoro.
Sigon sa Philippine Coast Guard nga ang barko nga MV Our Lady of Fatima 03 nahimutang mga 670 metros gikan sa baybayon sa dihang kalit kini mihunong alas 7:45 sa buntag.
Sumala sa Coast Guard Sub-Station Lubang, bag-o lang mibyahe ang barko gikan sa Tilik Port ug padulong sa Nasugbu sa dihang miigo kini sa batuhong ilawom sa dagat.
Sa inisyal nga report gikan sa kapitan sa barko, ang pagkasangad niini tungod sa ubos nga tide o paghubas sa tubig dagat.
Sumala pa sa PCG, adunay 162 ka pasahero ug walo ka crew members sakay sa barko sa oras sa insidente.
Gikompirma sa Coast Guard nga ang tanang 170 ka indibidwal anaa sa maayong kahimtang.
Paspas ang rescue operations, diin ang tanang pasahero gibalhin ngadto sa MV Princess Christine II alas 8:40 sa buntag ug luwas nga nabalik sa Tilik Port sa alas 9 sa buntag.
Bisan pa man nga ang barko nagdala og mga 250 ka litro sa marine diesel ug 45 ka litro sa lube oil, gibutyag sa PCG nga wala silay nakitang timailhan sa oil spill o polusyon sa dagat.
Gikompirma usab sa ahensiya nga ang lugar diin nasangad ang barko wala nahisulod sa bisan unsang Marine Protected Area.
Bisan paman nga hangtud sa kasarangan ang kahimtang sa panahon ug dagat, nagpabilin nga partially grounded ang barko sa mabaw nga bahin.
Gitambagan ang kapitan nga mag-file og pormal nga marine protest, ug ang crew giplanohan nga mohimo og underwater hull inspection aron susihon ang kahimtang sa istruktura sa barko.
Isip pag-amping, ang Coast Guard Station Occidental Mindoro nagrekomenda nga ang Maritime Industry Authority Regional Office IV mopahunong sa Passenger Ship Safety Certificate sa barko. Sa karun usa ka komprehensibong imbestigasyon sa insidente ang gipahigayon.
