BUTUAN CITY – Wala’y plano ang pamilya sa naghikog nga 11-anyos nga batang lalaki nga taga-Buenavista, Agusan del Norte nga ipa-otopsiya ang patay’ng lawas niini tungod kay kumbinsido silang wala’y foul play sa maong hitabo.
Kini ang giklaro sa imbestigador sa maong kaso nga si SPO3 Elvie Octobre sa Buenavista Municipal Police Station sa pakighinabi ning sibyahan.
Gibutyag sa maong police officer nga wala’y laing nakitang rason ang pamilya sa biktimang si Kyle Pangan, residente sa Sitio Tinago, Brgy, Matabao, usa ka grade 5 pupil, nga rason sa pagpakamatay sa bata ilabina nga wala kini gina-bully tungod kay nagtungha kini sa usa tunghaang gidumala sa simbahan.
Posibleng nahi-ubos matud pa ang bata dihang gikasab-an sa iyang lola og nahapakan human nagisi ang iyang shorts atol sa pagdula niini og basketball kagahapon sa hapon.
Wala matud pa magtuo ang apuhan nga mahimo kini sa iyang apo tungod kay dili ra man kadto ang unang higayong nahapakan niya kini gamit ang tualya.
Nasuta pa sa ilang imbestigasyon nga malipayon pa ang biktima atol sa ilang pagpani-udto hangtud nga nagdula na kini og basketball pagka-ala una sa hapon.
Mipa-uli matud pa kini pasado alas-kwatro na sa hapon diin natigayon ang pagkasaba sa biktima.
Dihang nawala an kini og pipila ka oras sa ilang panan-aw ila na kining gipangita og napalgan na lang nga nagbitay na sa likod nga bahin sa ilang panimalay kondiin gidala pa kini sa ospital apan wala na kini maka-abot pang buhi. (Beth Ruiz)
