BUTUAN CITY – Mi-abot sa ₱714, 000.00 ang kantidad sa 105-gramos nga suspected shabu nga nakumpiska atol sa gilusad nga drug buy-bust operation pasado alas-9:38 kagabii sa may Brgy. Baan Km. 3, ning siyudad sa Butuan.
Nakuha kini gikan sa posisyon sa naarestong kanhi sundalong si Garry Daluz, usa ka high-value individual kon HVI, 38-anyos, ulitawo ug residente sa Purok 5, Brgy. Caasinan, Cabadbaran City, lalawigan sa Agusan del Norte. Apil sa nakuha gikan sa suspetsado ang usa ka keypad cellphone; duha ka ID, 3 ka ATM cards; mga personal nga gamit, usa ka motorsiklo ug yawe niini.
Gihimo ang operasyon sa mga operatiba sa Philippine National Police-Drug Enforcement Unit, uban sa Butuan City Police Station 1 ug sa Philippine Drug Enforcement Agency kon PDEA -Caraga.
Ang suspetsado ingon man ang nakumpiskang mga gamit lakip na ang usa ka one-thousand peso bill nga marked money kansa gibutang ibabaw sa 149 ka buok nga susamang kantidad nga mga boodle money, gi-turn over na ngadto sa imbestigador sa kaso samtang ang suspected shabu gisubmite ngadto sa RFU-13 alang sa dangerous drug examination.
