BUTUAN CITY- Nasikop sa mga otoridad ang lima ka high-value target kon HVT atol sa gihimong buy-bust operation sa Philippine Drug Enforcement Agency kon PDEA kagahapon sa may 4:05 sa hapon Marso 2, 2026, sa Purok 5, Barangay Poctoy, Surigao City, Surigao del Norte.
Ang operasyon gipangulohan sa Philippine Drug Enforcement Agency kon PDEA Regional Office XIII-Surigao del Norte Provincial Office ubos sa pagpangulo ni Agent Paul Estalani, sa pakigtambayayong sa Surigao del Norte Provincial Office–Provincial Intelligence Unit, Surigao City Police Station Drug Enforcement Unit, ug PDEA RO 13–Local Police Units.
Nasakmit sa mga operatiba ang gibanabanang 60 gramos nga shabu kansa mobalor og ₱420,000 o ₱7,000 matag gramo, 2.5 grams nga shabu diin napalit sa poseur-buyer ug nasakmit usab ang ₱1,000 bill nga gigamit isip buy-bust money uban ang tulo ka ₱1,000 boodle money, duha ka Vivo Android phone, duha ka Redmi Android phone, usa ka Nokia keypad phone, usa ka black and white nga Honda Beat nga motorsiklo, usa ka yellow tricycle nga adunay plate number nga SC-2109 ug mga identification cards.
Ang lima ka mga nasikop mao sila si Garry Alciso y Maturan, 55-anyos, minyo, residente sa Purok 2, Brgy. Union, Taganaan, Surigao del Norte ug usa ka recidivist o kanhi na nga napriso.
Ronnie Malig-on y Taripe, 47-anyos, minyo, residente sa Pantalan 2, Brgy. Taft, Surigao City kanhi na usab nga napriso.
Carlo Ampater y Omapas, 39- anyos, minyo, residente sa Purok 11, Brgy. Poctoy, Surigao City. Glen Lolo y Lisondra, 45-anyos, minyo, residente sa Purok 5, Brgy. Don Julio, Surigao City ug si Angelo Precillas y Rebucas, 34-anyos, minyo, residente sa Purok Mabungahon, Brgy. Washington, Surigao City.
Atubangon sa mga suspetsado ang kasong paglapas sa Section 5 o Sale of Illegal Drugs ug Section 11 o Possession of Illegal Drugs ubos sa Article II sa Republic Act No. 9165 o ang Comprehensive Dangerous Drugs Act of 2002.
Sa pagkakaron, anaa na sa kustodiya sa mga otoridad ang mga nadakpan samtang gihulat ang inquest proceedings.
