BUTUAN CITY – Gisira na sa Uganda ang utlanan niini padulong sa silingang nasud Democratic Republic of Congo aron mapugngan ang pagkaylap sa Ebola ug sigon sa gobyerno sa Uganda, magpabilin kining sirado sulod sa upat ka semana, gawas lang sa mga Ebola response teams, humanitarian ug security operations, ug transport sa pagkaon ug kargamento.
Sigon ni Ugandan senior health official Diana Atwine, nakatala sila og pito ka bag-ong kaso sa Ebola ug ang namatay sa outbreak nga ang sentro anaa sa Ituri province sa Congo.
Ang Congo nakatala og kapin sa 900 nga gidudahang kaso ug labaw sa 220 nga namatay, base na sa pagkumpirma sa World Health Organization, ug nagdeklarar sa outbreak sa talagsaong Bundibugyo strain sa Ebola isip usa ka public health emergency nga naghatag og kabalaka sa tibuok kalibutan.
Ning miaging semana, gipahibalo sa gobyerno sa Uganda ang inisyal nga mga lakang aron mapugngan ang pagtabok sa virus gikan sa utlanan, lakip na ang pagsuspenso sa public transport services padulong sa Congo.
Gibutyag ni Atwine nga ang si bisan kinsa nga tugotan nga mosulod sa Uganda gikan sa Congo kinahanglan nga moagi sa mandatory nga self-isolation sulod sa 21 ka adlaw.
