BUTUAN CITY – Usa ka turista ang patay samtang laing lima ang angol human nakurentihan dihang mi-igo ang kilat duol kanila atol sa ilang pag-tour sa Naked island, General Luna lalawigan sa Surigao del Norte.
Nasayrang patay nang nakaabot sa Siargao District Hospital sa lungsod sa Dapa ang biktimang si Lee Christian Ragosta Zamora, 30 anyos, manager sa QBE Insurance Company ug lumad nga taga-Taloto, Tagbilaran, Bohol.
Pasado alas-dos sa hapon samtang nag-picture taking sila dihang kalit lang mikilat ug didto mi-igo sa buhangin duol sa ilang gibarugan rason sa ilang pagkatumba.
Dali silang gidala sa mga pumpboat operators sa Siargao District Hospital sa Dapa apan gideklara nang patay ni Dr. Gia Gomez si Lee samtang nakalingkawas gikan sa kamatayon sila si Elain Jhane Ragosta Zamora, 19 anyos; Princes Figuracion Jayme, 23 anyos taga Banilad, Cebu; Zuzanne Sagamol, 27 anyos taga barangay Sun Valley, Paranaque City; ug Grace Rodriguez Tolibas, 28 anyos taga Barangay 5 General Luna.
