BUTUAN CITY – Nabalaka ang mga lumopyo sa Brgy. Cawilan, Tubod, Suridao del Norte human gilunopan ug taga-tuhod ang ilang mga panimalay.
Sumala sa usa ka residente, wala na nila madali pa sa pagsakwat ang ilang gamit tungod sa kalit nga pagbul-og sa tubig nga duna’y sagol nga lapok nga gitu-ohang gikan sa dumpsite sa Greenstone mining.
Gawas sa nangabasa nga mga gamit sulod sa panimalay sama sa refrigerator ug gas range, nahumol usab sa tubig ang ilang mga binuhing baboy og nangalumos ang mga piso sa ilang binuhing manok.
Kumpyansa lang matod pa sila tungod kay hinay lang ang pagbundak sa uwan ingon man nga dili usab bahaon ang maong lugar. Nikabat sa 4 ka bobong ang na grabehan sa baha samtang gikahadlokan usab nila ang posibleng pagdahili sa bukid sa nasangpit nga lugar.
Samtang sa pakighinabi sa Bombo Radyo Butuan , gipadayag ni Cawilan, Tubod Brgy. Captain Ronaldo Juanite, gibutyag niini nga nagpahigayon gilayon ug meeting ang lokal nga panggamhanan sa nasangpit nga barangay ngadto sa mga apektadong residente aron mahisgutan ang ilang mamahimong lakang.
Sa pagkakaron, napadala na nila ang communication letter ngadto sa buhatan sa Greenstone Mining aron imbitahan ang ilang mga opisyal ugmang adlawa, Miyerkules alang sa ilang himuong pakigpulong. (Melody Valledor)
