BUTUAN CITY – Mikampyon sa bag-ohay pa lang nahuman nga 24th Siargao Cloud 9 Surfing Cup nga gipahigayon sa Cloud 9 Surfing site sa Barangay Catangnan, General Luna sa probinsiya sa Surigao Del Norte ang pambato sa Estados Unidos nga si Skip McCullough.
Alang kini sa WSL Qualifying Series kon QS 3,000 event.
Apan wala nagpa-ulahi ang pambato sa Pilipinas nga si John Mark Tokong nga nakakuha sa First Runner Up diin nalupig niini ang kapin sa usa ka gatus ka mga surfers gikan sa nagkalain-laing mga nasud alang sa international category.
Lakip sa nabutang sa final five ang gikan sa Hawaii, Australia ug Malaysia.
Sa interview sa Bombo Radyo Butuan, gipadayag ni Maria Anna Nugid, regional director sa Department of Tourism kon DOT-Caraga, nadag-an sa Amerikanong si Skip McCullough ang 75-mil dolyares kon kapin sa 4-milyunes pesos nga ganti human nanguna sa maong international surfing cup nga gisugdan niadtong Septembre 29.
Sumala pa sa opisyal, hapsay ug malinawon ang maong aktibidad nga gikonsiderang pinakadakong tinuig nga sporting event sa Pilipinas.
Malipayon matud pa ang tanan nga misaksi sa maong kompetisyon og sa pagpabilin pa sa isla og gipasalamatan ang tanang nahimong kabahin sa malampusong kompetisyon.
Samtang giklaro usab ni Nugid nga padayong nagkataas ang tourist arrival sa isla humangipaningkamutan sa lokal nga kagamhanan nga makabutang og mga kahimanan og pasilidad nga muresponde panahon sa emerhensiya nga maoy concern sa mga turista. (Rolan Janea)
