BUTUAN CITY – Gideklara na nga wala na’y kinabuhi sa attending physician si Rex Cabatingan, 24-anyos, ulitawo, residente sa may Brgy. Bonbon ning syudad dihang gidala kini sa ospital human napalgan na lamang nga nagbuy-od na sa diversion road sakop sa may Brgy. Bayanihan ning syudad sa Butuan kaganinang kadlawon.
Base sa inisyal nga imbestigasyon sa mga sakop sa Butuan City Police Station 3 sa pagpanguna ni P02 Bernard Amora, ang handling investigator sa maong kaso, lango sa ilimnong makahubog ang biktima samtang nagmaneho sa motorsiklo.
Posible matud pa nga nadisgrasya kini sa iyang kaugalingong lihok o ba kaha adunay nakadasmag kaniya nga laing sakyanan.
Sigon sa silingan sa biktimang si Franklin Lumacang Jr., gigamit matud pa sa biktima ang iyang motorsiklo pasado alas-dose kaganinang tungang gabii aron mupalit pa og ma-inom kondiin gipa-uban pa niini ang iyang manghod kinsa mikanaog dapit sa City Sports Complex human nga wala maka-uyon sa iyang pagpadagan sa sakyanan.
Ilang gikatingala ang wala na pagbalik pa niini hangtud nga nasayran na lang nilang napalgan na kini uban sa iyang motorsiklo nga duna na’y mga damyos.
Samtang gibutyag usab sa igsoon sa biktima nga si Christian nga mikanaog siya gikan sa pag-angkas sa motorsiklo human gibati og kahadlok ilabina nga dili matud pa kini makamaong muminor kung anaa sa kurbadahon nga parte sa dalan.
Gi-agni pa siya pag-usab niini nga musakay og balik apan dihang wala kini musugot nga iyang pulihan pag-drive, nagdesisyon na lang siya nga mupa-uli hangtud nga ila na lang nabalitaan ang nadangatan niini. (Beth Ruiz)
