BUTUAN CITY – Gipasabot ni SPO3 Rolando Arquion – imbestigador sa kapulisan sa Magallanes, Agusan del Norte ang detalye kalabot sa napusilan-patay sa sa usa ka pulis, nga usa ka tricycle driver nga nanunggab kagahapon sa ka-uban ra usab niining driver.
Sa eksklusibong pakighinabi ning sibyahan, gi-ila ni SPO3 Arquion ang napusilan nga si Danilo Calunsag, 25-anyos, ulitawo kinsa maoy midunggab sa naka-away niining si Jojo Aylanco, 37-anyos, minyo og parehong mulupyo sa Brgy. Caloc-an sa maong lungsod.
Migawas sa ilang imbestigasyon nga daan nang duna’y bikil ang duha tungod sa binirahay og mga pasahero.
Kamatu-uran niini, nagsumbagay matud pa ang duha ning mi-aging adlaw kondiin maayong pagkabun-og sa mas gamay nga si Calunsag.
Kini ang hinungdan nga dihang nakit-an kini ni Calunsag kagahapon sa ilang public terminal nga naglingkod sa traysikol, gidunggab niini si Jojo sa makadaghang higayon gamit ang improvised ice pick.
Nakit-an matud pa kini sa nakalabay’ng si PO2 Gladys kinsa daling miresponde sa maong hitabo hinungdan nga kini na usab ang gi-atubang sa suspek dihang iya kining gibadlong.
Tungod kay gi-ilog niini ang pusil ni PO2 Gladys na sakop sa Butuan City Police Office, dinhi na siya gipusil sa tiyan nga milapos sa iyang sampot hinungdan nga dali kining gidala sa balay-tambalanan apan gideklarang dead-on arrival.
Isip pagtabang usab sa pamilya sa namatyan, abagahon sa nakapusil nga pulis ang tanang galastuhan sa gikan sa paghaya ni Calunsag hangtud nga ngadto sa iyang paglubong.
