BUTUAN CITY – Nagtapok-tapok ang tanang Datu sa tribong Higaonon sa probinsiya sa Agusan Del Sur, Agusan Del Norte, ug Misamis Oriental sa bukirang parte sa Sitio Linaw-linaw, Barangay Lower Olave sakop sa Buenavista, Agusan Del Norte.
Ang nasangpit nga kalihukan gitawag ug Talabugta Assembly nga mulungtad hangtud sa petsa 28 ning kasamtangang bulan sa Pebrero.
Tumong sa nasangpit nga asembliya nga mahisgutan ang ekonomikanhong sitwasyon sa tribo, pagpabalik sa balaodnong magdepensa sa katungod sa Higaonon ug ang kalinaw og panaghiusa sa tanang miyembro niini.
Sa pakighinabi ning sibyahan kang Datu Humol-og gikan sa Agusan Del Sur, giklaro niini nga nagpabilin gihapongn nagkahiusa ang tribong higaonon apan kinahanglan nila kining mas palig-onon pa pinaagi sa pagpatuman sa unsay balaodnon sa katigulangan.
Kini aron madepensahan ang kinaiyahan nga maoy nagbuhi sa ilang kaliwatan.
