BUTUAN CITY – Subay na sa pag-obserba ning buwan sa Oktubre isip Peasant and Indigenous People’s kon IP Month, libuang mga local farmers’ organizations og mga laity kon mga tawong simbahan ning rehiyon sa Caraga ang naglusad og martsa-rali kaganinang buntag dinhi sa dakbayan sa Butuan nga gibansagan nilang “Martsa laban sa Kagutuman, Kahirapan at Pasistang Estado.”
Uban sa nagkada-iyang support sectors sama sa mga lumad, urban poor, sidewalk vendors, transport sector, mga mamumuo, kababayen-an og kabatan-unan, gibana-banang mi-abot sa 5-mil ka lig-ong pundok sa katawhan ang midagsa sa kadalanan ning siyudad gikan sa tulo ka managlahing assembly points sama sa J Rosales St., North Montilla Blvd og South Montilla Blvd.
Nag-converge sila sa JC Aquino Avenue-Montilla Boulevard diin nagsunog sila og effigy ni Pangulong Rodrigo Duterte isip protesta batuk sa nagkataas nga presyo sa mga palaliton, nagkagrabeng pagpanglapas matud pa sa tawhanong katungod og pasistang pagpangatake batuk sa mga sa-op apil na ang nabani-og nga planong paglugway matud pa sa martial law sa Mindanao.
Sa eksklusibong interview sa Bombo Radyo Butuan, gibutyag ni Bishop Romeo Tagud, sa Promotion of Church of People’s Response sa Surigao City, giduyugan nila ang mga demonstrador aron seguradong mapa-abot ngadto sa nasudnong kagamhanan ang ilang nag-unang mga yangungo.
Apil na niini ang problema sa pagkaon apil na ang pagpanag-iya sa sa mga mag-uuma og kaugalingong yuta nga ilang tikaron nga nadugangan pa sa pagpang-harass matud pa kanila human giduhig nga mga supporters matud pa sa walhong kalihukan.
Gidugang pa sa obispo nga apil sa gireklmao sa mga lumad ang paghunong na sa padayong pagbahin-bahin og paghasi kanila ilabina kadtong padayong mibarog aron mapanalipdan ang ilang yutang kabilin nga gustong sudlon sa mga higanteng negosyante.
Gipasabot pa ni Bishop Tagud nga ang ilang pag-uban sa panon sa martsa isip paghimo lang sa ilang misyon nga mao ang pagpadayag sa kabubut-on sa Diyos nga mao ang pagdepensa sa kasagrado sa kinabuhi.
Kini ilabina nga bisan silang anaa sa simbahan, nakasinati usab og harassment og red taggings kon pagkutay kanila ngadto sa mga rebelde. (Beth Ruiz)
