BUTUAN CITY – Mag-agad lang ang kapulisan sa Nasipit, Agusan del Norte sa kabanay sa usa ka 9-anyos nga batang lalaki nga taga-Purok 1, Brgy. Libertad ning siyudad sa Butuan sa sunod nga lakang nga ilang himuon human namatay ang biktima dihang nadat-ugan sa punuan sa lubi nga nabali kagahapong adlawa sa beach resort sa Brgy.CUbi-Cubi sakop sa maong lungsod.
Sa pakighinabi ning sibyahan, gibutyag ni Police Master Sergeant Elmer Aranay nga naligo og dagat ang biktima ka-uban ang iyang pamilya ug naghulat sa gawas nga bahin sa banyo aron unta manghimaw-an na.
Nakurat na lang ang tanan dihang nabali na ang punuan sa lubi nga didto nahulog sa nahimutangan sa biktima hinungdan sa pagkabu-ak sa iyang ulo ug pagkabali sa mga tiil.
Migawas sa ilang inisyal nga pakisusi nga plano na sa tag-iya sa beach resort nga putlon na ang maong punuan tungod sa kagabok na niini apan wala lang matud pa nahatagan og saktong panahon. Gitutukan una sa pamilya ang pagplastar sa patay’ng lawas sa biktima ug misaad ang opisyal nga andam silang mu-assist sa pamilya sa biktima kung mupasaka ba sila og kaso batuk sa tag-iya sa maong beach resort. (REPORTS FROM: Bombo Lilibeth Ruiz)
