BUTUAN CITY – Temporaryong ihunong sa rebeldeng New People’s Army kon NPA ang ilang opensiba batuk sa pwersa sa gobyerno karong panahon sa Semana Santa.
Sa pakighinabi ning sibyahan, gibutyag ni Ka Oto, tigpamaba sa Guerilla Front 16 sa NPA, base sa sulat-pahayag nga pinirmahan ni Ka Ariel Montero sa Regional Operational Command sa Bagong Hukbong Bayan-Northeastern Mindanao Region, gimando niini ngadto sa ilang Bagong Hukbong Bayan kon BHB og milisya ng bayan, ang temporaryong paghunong sa paglusad og mga taktikal nga opensiba batuk sa pwersa sa kapulisan og kasundaluhan sugod sa Marso 28 hangtud sa Abril 1 ning tuiga.
Kini aron ipakita ang ilang isip kinasingkasing nga pagsuporta sa mga Kristiyanos alang sa malinawon ug malampuson nga pagbalaan sa Semana Santa.
Gituyo usab kini subay sa umalabot nilang pagsa-ulog ang ika-49 nga anibersaryo sa kamugnaan sa Bagong Hukbong bayan niadtong Marso 29, 1969.
Apan giklaro niini nga kinahanglan gihapong ipatunhay ang mga aktibong depensa sulod sa ilang mga area. (Mon Aplaya)
