BUTUAN CITY – Nagduso si Quezon City Representative Jose Chaves Alvarez og resolusyon nga naghangyong imbestigahan ang System Loss Charges nga gipahamtang sa bayranan sa kuryente aron masiguro nga patas, klaro ug igo pa ba gihapon ang proteksiyon niini alang sa mga konsumidor.
Sigon ni Alvarez, importante nga ipahigayon ang maong pagdungog ilabina nga adunay mga gisugyot nga balaodnong nagtumong sa hingpit nga pagtangtang sa system loss charges.
Sa maong imbestigasyon, gilauman nga imbitahon ang Energy Regulatory Commission (ERC), transmission provider, distribution utilities, electric cooperatives, mga consumer groups ug uban pang mga stakeholders aron ipasabot kung gi-unsa pagkalkula ang system loss charges ug kung ha-um pa ba kini sa kasamtangang mga balaod.
Tumong usab niini nga masuta kung gikinahanglan ba ang mga reporma aron mas mapalig-on ang pagpanalipod sa mga konsumidor samtang gisiguro ang hapsay ug padayon nga suplay sa kuryente.
