BUTUAN CITY – Ang mga 74-seater planes lang maoy temporaryong tugutang makagamit sa airport sa Surigao City human gideklara kagahapon sa Department of Transportation kon DOTr nga luwas na kining gamiton.
Sa pakighinabi ning sibyahan, gipadayag ni Vice Mayor Alfonso Casurra nga bisan og gideklara na sa national agency nga luwas nang gamiton ang maong tugpahanan apan tungod kay sakop pa kini sa ilang lokal nga kagamhanan, gipadayon ning adlawa sa mga personahe sa ilang City Engineering Office ang dugang inspeksyon.
Apan bisan pa man sa maong deklarasyon, wala pa gihapo’y eroplanong migamit sa maong tugpahanan human gimando sa mga airline companies ang re-scheduling, duha ka semana human gideklarang luwas na kining gamiton alang sa dugang pang safety inspection nga himuon.
Kini matud pa ang hinungdan nga fully book ang mga flights sa Bancasi Airport dinhi sa dakbayan sa Butuan tungod kay dinhi man gihansak ang mga pasaherong adto manukad sa Surigao Airport.
Mahinumdumang nahunong ang operasyon sa maong airport human naguba ang runway niini dihang gitay-og sa magnitude 6.7 nga linog ang maong siyudad. (Beth Ruiz)
