BUTUAN CITY – Gila-umang musaka pa ang ihap sa 473 ka mga pasahero ig 146 ka mga rolling cargoes nga na-stranded sa Port of Surigao City sukad pa kagahapon sa alas-onse sa buntag human gisuspende sa Coast Guard Station Surigao del Norte ang biyahe sa mga sakyanang pandagat padulong ug gikan sa Dinagat Islands Province, Bucas Grande Islands, Siargao Islands ug sa mainland Surigao.
Kini human gipa-ilalom sa storm signa number 1 tungod sa bagyong Ada ang mga lalawigan sa Dinagat Islands, ingon man Surigao del Norte ug Sur.
Sa eksklusibong interview sa Bombo Radyo Butuan, gipadayag ni Coast Guard Station Surigao del Norte Commander Ensign Roy Christopher Orillaneda nga karong buntaga maghatag sila og pamahaw, mga snacks, ug posibleng paniudto kung dili pa gihapon tugotan nga makalwig ang mga sakyanang pandagat, gawas sa mga roll-on roll-off o ro-ro vessels.
Nagpakigkoordinar usab sila sa local government unit ug sa mga concerned government line agencies aron maatiman ang mga na-stranded nga pasahero.
