BUTUAN CITY – Magmugna ang Caraga Regional Task Force kon RTF-One Caraga Shield og technical working group aron maoy mu-assess ug mu-evaluate sa epektong hatud sa enhanced community quarantine kion ECQ dinhi sa rehiyon.
Ang nasangpit nga grupo langkuban sa mga technical men ug mga respresentante sa matag-lalawigan ning rehiyon kinsa mao usa’y mususi sa mga rekomendasyong angayang buhatan higayong matapos na ang ECQ.
Sa eksklusibong pakighinabi sa Bombo Radyo Butuan kang Agusan del Norte Governor kinsa mao usa’y chairman sa RTF-One Caraga Shield Dale Corvera, gipadayag niining kinahanglang pangandaman nila ang angayang buhaton higayong tangtangon na ni Pangulong Rodrigo Duterte ang ECQ sa mga dapit nga apektado sa coronavirus.
Kini tungod kay mao kini ang maghatag og dalan aron makagawas na ang mga tawong natanggong ug gustong mu-anhi o kaha mupa-uli na sa rehiyon.
Iyang gi-angkon nga naka-abot na kanila kini nga concern ug ila na kining gitutukan aron makakab-ot og tawhanong desisyon nga matubag ang hangyo sa natanggong nga mga Caraganons nga gusto nang mu-uli kansa susamang higayon, dili usab mabutang sa alanganin ang panglawas sa mga Caraganons.
Sa pagkakaron, mi-apela ang opisyal sa mga na-stranded nga Caraganons nga magpabilin una sa lugar diin sila natanggong samtang nagtunhay pa ang ECQ.
Kini human nasayrang mihimo na og tagsa-tagsa nila ka mga lakang ang mga hingtungdang LGUs diin nasakop ang lugar nga ilang gipuy-an sama sa paghatag kanila og cash assistance o bayad sa hotel o kaha boarding house nga ilang gipuy-an.
