BOMBO BUTUAN – Ipa-ilalom sa state of calamity ni Mayor Librado Navarro ang Brgy. Mangagoy, Bislig City sa lalawigan sa Surigao del Sur human ang dakong sunog kagahapon sa Marketsite sa may Purok. 5 Caramcam District.
Sa eksklusibong interview sa Bombo Radyo Butuan, gipadayag ni Mayor Navarro nga padayon pa nilang gipakisayran ang kinatibuk-ang ihap sa mga apektadong pamilya og indibidwal apil na ang kdamyos niini ilabina nga mi-abot sa halos 200 ka kabalayan ang na-abo sa sunog.
Migawas sa inisyal nga imbestigasyon nga nagsugod ang kalayo sa pinuy-anan sa pamilya Alngog tungod sa napasagdang para dinung-ag alang unta sa ilang pani-udto.
Tungod kay dikit-dikit ang kabalayang gama sa light materials, dali kining gilamoy sa kalayo og nadeklarang fireout pasado alas-2:30 na sa hapon.
Mi-abot sa siyam ka mga firetrucks ang miresponde apil na ang sa kasikbit nga kalungsuran.
Mitala usab kini og usa ka tawong patay human gi-atake sa sakit sa kasing-kasing tungod sa sobrang kabalaka samtang wala’y natalang angol.
