BUTUAN City – Gitawag nga Anti-Poor sa usa ka magbabalaod ang kasamtangan karong sistema sa birth registration dinhi sa nasud.
Sa pakighinabi ning sibyahan, gibutyag ni Cong. Lawrence Fortun sa 1st District sa Agusan del Norte, nga gikonsidera niini nga usa ka anti-poor ang kasamtangang sistema sa Civil Registry System sa nasud tungod kay daw gisilotan naman hinuon ang mga kabus tungod sa ilang pagkakabus.
Nasayran nga ilawom sa kasamtangang sistema, aduna na’y bayad kung ma-late na ang pagparehistro sa matawong bata.
Sigon niini, nga dili ikalimod nga kasagaran sa mga rason sa late registration mao man ang kalayo sa lugar kungdiin natawo ang bata, ang kalisod sa kwarta sa mga ginikanan ug kawala’y insaktong kasayuran nila mahitungod sa kamahinungdanon sa birth certificate.
Ug tungod niini, gihingusgan karon sa maong magbabalaod nga mapalig-on ang Barangay Civil Registry System sa nasud. Ilawom matud pa kini sa mas komprehensibo nga proposed bill nga bag-ong Civil Registration Act kangsa nagtumong nga mamahimong I-deputized officers na ang mga barangay officials hilabi na ang mga barangay secretary diha sa Office of the Civil Registrar aron nga pwede na nga mapahigayon ang birth registration diha mismo sa barangay.
Nagtinguha matud pa kini nga mamahimong accessible na ang birth registration ngadto sa tanan bisan paman niadtong nanimuyo sa mga lagyong lugar.
