BUTUAN CITY – Gikalipay sa mga turista apil na sa mga residente sa Siargao Island ang gibutang nga Incident Command Post sa probinsyal nga panggamhanan sa Surigao del Norte sa may Cloud 9, ang surfing destination sa Siargao Island kansa duol lang sa OhWOw surf.
Ang maong post maoy magsilbing first aid team sa isla kansa sakop sa lungsod sa General Luna gituyo pagmontar aron duna gilayo’y makaresponde panahon sa mga disgrasya.
Gibutang sa lokal nga kagamhanan ang nasangpit nga post human nag-viral sa social media ang reklamo sa journalist nga si Karen Davila dihang nadisgrasya ang iyang anak niadtong Huwebes Santo samtang nagpatudlo og surfing. Gawas sa Incident Command Post, duna usa’y naka-standby nga rescue team sa matag-surf spots sa maong isla.
Ang maong kalambuan, gikalipay usab ni Davila kinsa nagkomentaryo nga mas luwas na karon ang Siargao human usab nasayran niini nga usa ka surfer ang natahian sa iyang ulo dihang nasamad human na-igo sa dakong bato atol sa iyang pag-surfing. (Beth Ruiz)
