BUTUAN CITY – Gikostudiya na sa Regional Drug Enforcement Unit kon RDEU-13 ang gibana-banang ₱1.7-M nga kantidad sa binulto nga gitu-uhang shabu nga nakumpiska atol sa gilusad nga drug-buy bust operation pasado alas-11:16 kagabii sa Purok 7, Brgy. Villa Kananga ning siyudad sa Butuan nga mitimbang og 250-gramos.
Nakuha kini gikan sa posisyon nila alyas Jebby, 32-anyos, minyo, glass installer, residente sa Brgy. 1, Cabadbaran City ug alyas Jason, 38-anyos, residente sa Brgy. Doña Rosario, lungsod sa Tubay, parehong sakop sa lalawigan sa Agusan del Norte.
Gilusad ang joint operation uban sa mga sakop sa Police Regional Office kon PRO-13 kauban ang Philippine Drug Enforcement Agency kon PDEA-Caraga, Butuan City Police Office – Drug Enforcement Unit ug Butuan City Police Station kon BCPS1.
Sigon ni Kapitan Venusto Clarito Jr., kini ang unang higayon nga nakakuha ang mga otoridad og binulto ug ingon niini kadako nga ginadiling druga sa ilang barangay nga gikatakdang dalhon matud pa sa Surigao area.
Gi-andam na sa kapulisan ang mga ebidensya ug mga dokumento alang sa pagpasaka kanila og mga kasong paglapas sa sections 5 ug section 11 sa R.A 9165 kon mas nailang Comprehensive Dangerous Drugs Act of 2002.
