BUTUAN CITY – Malampusong napahigayon sa kasundaluhang sakop sa 29th IB, PA ang serbisyo caravan didto sa may Brgy. Mahaba, Bay-ang, og Puting Bato sa syudad sa Cabadbaran, lalawigan sa Agusan del Norte.
Sa pakighinabi ning sibyahan, gibutyag ni Lt. Col. Glenn Aynera, commanding officer sa 29th IB, PA, kini kabahin sa peace and development effort sa gobyerno ngadto sa mga depressed barangays kansa mao na ang ikatulong peace caravan sa area sa 29th IB.
Tumong niini nga mapabati ngadto sa katawhan nga nanimuyo sa maong mga lugar ang mga programa ug serbisyo sa gobyerno.
Kaabag sa kasundaluhan ang probinsyal nga panggamhanan sa Agusan del Norte pagpanguna ni Gov. Angel Amante – Matba ug nagkadaiyang ahensya sa gobyerno.
Lakip sa nakapahimulos sa maong caravan ang mga lumad gani aduna pa’y pinasahing serbisyong gitanyag ang Agusan del Norte Police Provincial Office kungdiin gikuhaan ug kuto sa ilang mga ulo ang mga mipahimulos nga lumad.
Lakip sa mitambong sa maong kalihukan ang brigade commander sa 402nd Brigade, PA pinaagi ni Gen. Nemesio Franco Gacal, mga miyembro sa Sangguniang Panlalawigan sa Agusan del Norte ug Sangguniang Panlungsod sa syudad sa Cabadbaran.
Subay niini, gipasalig sa maong opisyal nga aduna pa’y musunod nga mga barangay nga mapahigayunan nila ug mga peace caravan hilabi na sa may lungsod sa Kitcharao ug Jabonga, ning probinsya sa Agusan del Norte. (Rolan Janea)
