BUTUAN CITY – Giplanuhan karon sa lokal nga panggamhanan ning syudad sa Butuan uban sa pipila ka ahensya sa gobyerno ang pagpahigayon sa Senior High School Forum and Fairs karon nga semana.
Sa pakighinabi ning sibyahan, gibutyag ni Butuan City Councilor Atty. Glenn Carampatana, chairman sa Committee on Education sa Sangguniang Panlungsod ning syudad, tumong niini nga hisgutan kung unsa’y angayang buhaton sa mga unang batch sa senior high school students nga mugradwar karong tuiga sa ingon maggiyahan ang mga bag-ong graduates sa senior high sa mga insaktong buhaton aron dili sila madugang sa kasamtangang ihap sa mga wala’y trabaho dinhi sa syudad.
Atol sa maong kalihukan, mangimbitar ug mga representante gikan sa DepEd, CHED, TESDA, DOLE, PESO, ug DTI ang lokal nga kagamhanan ning syudad nga maoy mutudlo sa mga graduates kung unsay angay nilang buhaton kung sila gusto mupadayon sa pagtungha sa kolehiyo, mangita ug trabaho o ba kaha mag-negosyo.
Nasayrang karong tuiga, mugraduwar ang unang batch sa mga magtutungha sa Senior High sukad gipatuman ang K to 12 Program sa gobyerno. (Mon Aplaya)
