BUTUAN CITY – Gipangunahan ni PCol. Yaya Bustamante Yuso, provincial director sa Agusan Del Sur Police Provincial Office ang send-off ceremony kagahapong adlawa ngadto sa 700 ka security personnel nga magpatuman og seguridad sa ipahigayong Caraga Regional Athletic Games 2024 diin host ang maong probinsya.
Sigon ni Police Lt. Col. Jude Cres Milan, tigpamaba sa Agusan Del Sur Police Provincial Office, 24 oras nga mag-monitor og magpatuman sa seguridad ang mga security personnel nga gilangkuban sa kapulisan, kasundaluhan og gikan sa Bureau of Fire Protection kon BFP sugod sa Mayo 5 hangtud 11.
Gawas sa mga venues sa dula, hugot usab nga hatagan og seguridad ang mga billeting quarters nga nahimutang sa San Francisco, Bayugan City, Rosario og Prosperidad.
Sumala pa ni Police Lt. Col. Milan, sa billeting area, magtakda ug curfew hours samtang bawal sa gawas ang mga bisita ug kung ang mga atleta makasulod na, bawal na kining mogawas hangtud nga dunay pagtugot sa ilang mga opisyal.
